蘋果日報 │ 2019-04-09 有「劇團王子」之稱的潘燦良，最近憑電影《逆流大叔》獲提名「第38屆香港電影金像獎」的「最佳男配角」，但早於廿年前，他曾憑《南海十三郎》同樣角逐「最佳男配角」，算是有經驗吧！早前他在北角接受《蘋果》訪問，談到提名感受，潘燦良說︰「當年年少氣盛，希望自己進一步攞到獎，當金馬失落咗，以為金像獎有機，期望大咗，係有少少失落，尤其同戲嘅謝君豪攞咗金馬，點解自己唔係咁好彩呢？好快自己都清醒番，攞獎都要有天時、地利、人和嘅配合，失落之後又回歸番事實，踏踏實實喺劇團工作。」 廿年後機會重來，他說︰「心情都分別幾大，廿年後再有咁嘅安排，真係無求喇！而且我哋嘅團隊，不止一個有提名，所有人成就緊呢個幸運，平常心，好好享受呢個提名。」同戲的黃德斌同樣獲提名「最佳男配角」，問他會否擔心分薄票數？他說︰「我唔會用鬥嘅心態去睇，同埋今次提名名單，有識嘅、有合作過嘅，大家都努力過，邊個成為最優秀，會戥對方開心。」 雖然在電影圈暫未有獲獎經驗，不過他在舞台劇界，曾先後獲3次男主角及3次男配角獎，說他得獎經驗多，他卻笑說︰「其實我冇得獎嘅經驗都好多，哈哈！呢個階段其實我好享受喺3個媒介（舞台、電視、電影）都可以工作。」當晚頒獎禮，他早已邀請女友蘇玉華陪同他出席，「佢話梗係去啦，驚我唔邀請佢。」 在《逆》片中，導演陳詠燊筆下的黃淑儀，是個「冇料扮四條」的男人，但在潘燦良的演繹下卻甚有喜劇感，意外地令觀眾受落，「一個大男人叫淑儀，其實我哋身邊真係有咁嘅人，唔知有幾多個大叔，睇完會有同感，呢點就係個角色嘅血肉。」問到他有沒有與黃淑儀的性格相似？潘燦良說︰「其實我都好宅好怕醜，但同我係演員係兩回事，以前我唔係好識接觸人，而家更加認識自己。」 一般的男女朋友，甚少會一齊工作，但潘燦良和蘇玉華卻是例外，前年二人更合組劇團，問他會否為工作而有拗撬？他說︰「我哋唔用嗌交嚟形容，我哋係討論，因為大家都係專業。」他坦言在工作過程中，會各有己見，「我哋會互相討論同尊重，一齊生活一齊經歷事業，我哋合作得好好，大家返到屋企煮飯都會討論，係幸福，如果真係有嗌交，只係我未夠成熟。」二人將會合作演出香港話劇團，一部長達8小時的舞台劇《如夢之夢》，是香港公演以來，最長的一部劇目，他雖然是重演，但今次女友蘇玉華都有份參與，當然令人期待。 最佳男配角提名名單︰ 黃德斌 《逆流大叔》 潘燦良 《逆流大叔》 李璨琛 《淪落人》 廖啟智 《無雙》 袁富華 《翠絲》 採訪︰羅婉玲攝錄︰廖達燊場地︰高興+（北角）