都市日報 | 2015-08-04

愛好舞台劇的觀眾，對潘燦良絕對不陌生，這位「劇團王子」早已是舞台劇界的「最佳男主角」，在演戲路上，他即將進入銀禧之年，然而他跟女友蘇玉華，不經不覺也拍拖19年，早已像老夫老妻，去年潘燦良在日本旅行，即興向女友蘇玉華求婚。雖然兩人婚期如今還未落實，但對於一對情侶、一對夫妻，甚麼最重要？潘燦良說：「互相信任大家，亦好需要大家。」

最近潘燦良忙於排戲，與同是好戲之人黃秋生、吳君如和甄詠蓓即將公演舞台劇《狂揪夫妻》，多年前他已演過這個劇本改編的舞台劇《豆泥戰爭》，不同的是上次他是演秋生的角色，今次演另一個男角色，他笑謂：「幾難得兩個男角都畀我演過。」語氣有點招積，不失Hill少（港視劇《來生不做香港人》的角色）味道。

有你有我

作為男人，戲中他被演老婆的甄詠蓓掟電話，兩公婆突然反面無情，「我演一個生意人，電話對佢嚟講好緊要，其實兩公婆潛藏咗啲嘢好多年，一下子爆發出嚟，係典型嘅夫妻關係，觀眾睇到會好有共鳴。」現實中他和蘇玉華有這種共鳴嗎？他笑了一笑說：「或多或少都會有，但係我哋冇咁暴力。」兩人拍拖多年，而這行向來有不少誘惑，難道沒遇過沒想過嗎？潘燦良說：「我哋好信任大家，亦好需要大家，誘惑嘅嘢係你自己想先至會有。（沒遇過戲假情真？）冇喎！（可以分得咁開？）我哋兩個保持得好好，所以冇枝節出現。」阿蘇可以放心吧！

浪漫求婚

兩人相處要經得考驗，潘燦良和蘇玉華正是這對璧人。去年終於有好消息，潘燦良的起心肝在日本旅行期間，即興向阿蘇求婚，「 啱啱落完雨，都幾浪漫㗎，係咪聽到都好冧呢！其實一直都有咁嘅打算，只係冇落實係點或者幾時，大家冇落實個框架。

（家人冇催你哋？）因為大家知道好穩定，隨遇而安。」

談到生兒育女，兩人年紀也不小，會否做高齡父母？他肯定的說：「初步嚟講係唔會，香港環境令小朋友好辛苦 。

（阿蘇嘅睇法呢？）我哋都幾有共識，一直都好享受兩個人嘅生活。」平日兩人如何維繫感情？他說：「煮飯、去旅行，大家都鍾意睇戲，睇完會一齊討論吓，我哋有好多共同話題傾，可以傾一晚。（關係好和諧？）我哋好少嗌交。」

撰文： Tiffany、Ling 攝影： Eddy 場地：港威酒店